خدعوك فقالوا : الربح من الانترنت سهل الجزء التاني

خدعوك فقالوا : الربح من الانترنت سهل الجزء التاني

 كنا اتكلمنا في الجزء الاول عن الربح من الانترنت مابين الربح بجد والنصب وقولنا ان الانترنت هو اداة ممكن استخدامها بشكل ايجابي او سلبي وكنت وعدتكم اني هتكلم عن الطرق الايجابية للربح من الانترنت بس الحقيقة لقيت ان في ناس كتير حصل عندها تضارب في بعض المفاهيم وخلطت الدنيا ببعض فالمقالة دي هوضح فيها شوية مفاهيم مهمة والمقالة الجاية ان شاء الله نقول ازاي ممكن اكسب من الانترنت على فكرة المكسب من الانترنت مش بس في التسويق او بيع المنتجات او الترويج للخدمات في حاجات تانية كتير اوي ممكن تحول فيها موهبتك او هوايتك لمصدر دخل

الربح من الانترنت

المفاهيم اللي هنتكلم فيها النهاردة هي الفرق مابين التسويق الشبكي ، التسويق الالكتروني ، الافيلييت

التسويق الشبكي :

واحد من ادوات التسويق بشكل عام ومكانه في الترويج وله انواع واشكال مختلفة زي مثلا التسويق الشبكي الافقي وده اللي بتستخدمه مثلا شركة افون بتاعة منتجات التجميل الشركة بتعتمد على البيع المباشر بدون دعاية او ترويج ليها من خلال الناس بمعنى انك بتروح تاخد منتجات من الشركة مثلا بمبلغ معين وتبدأ توزع المنتجات دي على الناس اللي انت تعرفهم وبتاخد نسبة او عمولة او مبلغ زيادة عن اللي بتدفعه للشركة يعني مثلا المنتج بتاخده من الشركة ب100ج تبيعه ب120ج  والفرق ده بيكون ليك وكمان بتبدأ تكون مجموعة من الناس اللي بتاكون تحتك يعني انت بتكون الوكيل بتاع الشركة وهم الموزعين وبعد فترة من المبيعات بتكون خدت لقب منسق وممكن يكون لك مكتب في الشركة تدير بيه شغلك المهم انك بتكون تحتك طبقة افقية من الموزعين وانت بتكسب وهم بيكسبوا وده من انجح انواع التسويق الشبكي وايفون محققة نجاح كبير بيه جوه مصر وبرة مصر

في نوع تاني من التسويق الشبكي اللي هو الثنائي وده اللي بتستخدمه شركة كيونت وبصرف النظر انت متفق او مختلف معاها هشرحلك باختصار هي بتعمل اية

عشان تشترك اولا بتدفع مبلغ مقابل احد منتجات الشركة المبلغ بيكون اكبر من قيمة المنتج بكتير ده في رأيي ناس كتير جربت الموضوع ده وبعدين بتجيب ناس تحتيك بس بتمشي بشكل ثنائي يعني اية يعني لازم تجيب اتنين تحتيك والاتنين كل واحد لازم يجيب اتنين وهكذا فبتمشي كإنهم طرفين وكل واحد بيدخل الشبكة بتاعتك انت بتاخد فلوس واللي فوقك في الشبكة بياخد فلوس وهكذا طبعا كل ده بيعلي من سعر المنتج جدا وفي النهاية بيبقى في ضحايا انهم دفعوا وماقدروش يجيبوا ناس تحتهم عموما في تفاصيل اكتر كنت اتكلمت عنها هنا

اسرع طريقة للربح التسويق الشبكي 

ملحوظة : الناس اللي شغالة في كيونت ماتقراش الكلام ده عشان مش هيعجبك وهتهاجمة بشده فوفر على نفسك وعلي الجدال

في نوع تالت في التسويق الشبكي وهو الشجري وده بيبقى زي شركة ماي واي بتاعة التجميل بردو دي بقى مش بتبقى مقيد بشكل معين للناس اللي تحتك في الشجرة يعني انت بتجيب عدد تحتك والعدد بيجيب عدد تاني وكلهم في النهاية بيصبوا عندك بس بنسب طبعا في قواعد بتحكم الموضوع لأن كدة الشركة ممكن تفلس

في ناس كتير عملت ثروات مهولة من التسويق الشبكي وفي ناس استخدمته في النصب زي ما قولت هي اداة وانت بتستخدمها زي مانت عايز فالتسويق الشبكي مش نصب بس في ناس بتستخدمه غلط

التسويق الالكتروني

online marketing

التسويق الالكتروني او الاونلاين ماركيتنج اداة تانية من ادوات الترويج في العملية التسويقية وباين من اسمه انك بتعمل ترويج على الانترنت وجواه تخصصات زي مثلا التسويق عبر مواقع التواصل الاجتماعي او Social Media  وفي التسويق عبر محركات البحث او SEO وفي الاعلانات المدفوعة زي جوجل وفيسبوك وده بنسميه SEM وفي الايميل ماركيتنج وفي الافيلييت ..... الخ بالتسويق الالكتروني انت تقدر تسوق اي حاجة منتج ، فكرة ، خدمة ، شخصية (زي الانتخابات مثلا ) وبردو في ناس بتستخدمه بشكل صحيح في شغلها وناس بردو بتستخدمه في النصب المهم لو عايز تتعلم تسويق الكتروني في عندك طرق كتير وممكن تشوف الموضوع ده جمعتلكم فيه تقريبا كل حاجة من مصادر ومواقع 

ازاي احترف التسويق الالكتروني 

الافيلييت 

اما الافيلييت وده واحد من انواع التسويق الالكتروني واللي معظم الناس بتقصد الربح عن طريق النت بالافيلييت او بتشتغل بيه

وتاني بقول انه اداة من ادوات التسويق في ناس بتستخدمه صح وناس بتنصب بيه

الافيلييت هو التسويق بالعمولة وهو في بعض الحالات بيتشابه بالتسويق الشبكي بس على الانترنت خلينا نوضح اكتر

الافيلييت بيكون عندك منتج مثلا وعايز تبيعه فبتعرضه على موقعك او مواقع تانية زي مثلا كليك بانك وبيدخل ناس تشوف المنتج ده وتبدأ تسوقه من خلال رابط بياخدوه للمنتج ده وكل شخص بيكون له رابط خاص عشان اللي بيدخل من خلال الرابط ده الشخص صاحب الرابط بياخد عمولة

affiliate marketing

نقول كمان

انت دلوقتي دخلت على موقع كليك بانك  بتعمل حاسب عليه وبتشوفت منتجات كتير بتختار منتج شايف انك تقدر تسوقه ساعتها بيديلك رابط الرابط ده انت مثلا بتنشره على موقعك او مدونتك واي احد بيجخل على الرابط ده وبيشتري المنتج انت بتاخد نسبه او عمولة وطبعا طرق نشر الرابط كتير في ناس بتستخدم السوشيال ميديا او المواقع ، المدونات ، المنتديات بتاعتها او بتعمل فيديو وتسوقه من خلال اليوتيوب يعني في طرق كتير

ومش بس كليك بانك اللي بتعمل كدة في شركات كتير زي بيت مثلا بتقدر تشتغل معاهم بأنك تاخد رابط وكل ماحد بيدخل من خلال الرابط ويسجل عندهم انت بتاخد عمولة على ده 

يعني مش شرط تكون بتبيع منتج بس عشان تاخد عمولة ممكن تدخل ناس تاخد خدمة ، تسجل في كورس مثلا ، تشوف اعلان معين لموقع وفي مواقع كبيرة جدا بتستخدمه كبنارات في مواقع تانية

المهم ان في ناس بتحقق ثروات من خلال الافيلييت وفي ناس بردو بتنصب بيه وده اكتر اداه الناس بتستخدمها بشكل سلبي اكتر من الشكل الايجابي مع انهم لو استخدموها صح هيكسبوا بردو بس تقول اية بقى

مش هطول عليكم اكتر من كدة المرة الجاية هنتكلم بقى ازاي تحول موهبتك او هوايتك لمصدر دخل ليك الربح من الانترنت مش بس تسويق ومش كله نصب  

by.shereen badr

تابع القراءة

خدعوك فقالوا : الربح من الانترنت سهل !

خدعوك فقالوا : الربح من الانترنت سهل !

السؤال المستمر دوما وابدا وهو انا ممكن اكسب من الانترنت فعلا ولا ده كلام بيضحك علينا بيه 

حضرتك على حسب في كلام نصب وفي كلام بجد وحقيقي 

يعني اية ؟

الربح من الانترنت بقت موضة زي موضة توظيف الاموال كدة في السبعينات والتمانينات في ناس استغلتها غلط وبتخدع الناس وبتنصب عليهم ايون بتنصب عليهم وبتبيع لهم الهوا وبتستغل طمع البعض في المكسب السريع او طيبة البعض الاخر وثقته في الاخرين الامحدوده 

الربح من الانترنت زي بالظبط واحد معاه فلوس ممكن يروح يحطهم في شركة توظيف ويتنصب عليه او يشغلهم في مشروع ويتابعه ويشتغل فيه بنفسه ويتعب فيه فيكسب منه فعلا 

الربح من الانترنت

خلوني اوضح اكتر : 

خلونا نتفق ان الانترنت هو اداة ممكن تستخدمها بالطريقة اللي تعجبك زي السكينة بالظبط ممكن تدبح بيها بني ادم وممكن تقطع بيها فاكهة ممكن تستخدم الانترنت بشكل ايجابي وتستغل وقتك عليه وتكسب منه فلوس فعلا وممكن يتنصب عليك او تشارك في النصب على ضحايا مش فاهمين 

خلونا نمسك الجانب السلبي الاول : 

في مثلا شركات طالعة موضة دلوقتي تقولك اية ادفع مبلغ معين 500 دولار مثلا وهتكسب آلاف الدولارت بعد كدة وساعات توسع منهم انها تبقى ملايين دول نصابين وش دول بقى بيعملوا اية يقولك مثلا اتفرج على فيديوهات اعلانات وكل اعلان هتتفرج عليه هتاخد فلوس وكل حد هتجيبة يدفع الخمسميت جنية هتاخد عليه فلوس فكدة انت بتعمل حاجتين اول حاجة انك بتلبس حد غيرك يدفع فلوس زيك بالظبط ومش هيطول حاجة اما بالنسبة للفيديوهات اللي المفروض تشوفها وتاخد فلوس عنها فهي المفروض انها اعلانات مدفوعة من شركات تم اقناعهم اني هرفعلك نسبة مشاهدة الفيديوهات الاعلانية بتاعتك وهي في النهاية مشاهدات وهمية لأنك اصلا مش الشريحة المستهدفة ومش مهتم بالاعلان قد ما انت مهتم تزود رصيد فلوسك وطبعا في امثلى كتير بس حبيت ادي مثال صغير

مثال كمان حاجة زي التسويق الشبكي بس على الانترنت التسويق الشبكي مش نصب لكن البعض بينصب باسم التسويق الشبكي وكذلك على الانترنت يقولك مثلا اشتري الكورس ده بمبلغ كذا ويكون مبلغ محترم وبعدين كل ما تبيع الكورس ده لحد هتاخد فلوس وطبعا حضرتك تشتري الكورس ولا تستفيد منه بأي حاجة وتحاول تلبسه لغيرك سواء بقى كورس او اي منتج تاني ابداعاتهم لا تنتهي  مع انك ممكن تستخدم نفس الأداة وبتجيب نتيجة كويسة جدا واللي اسمها الافيلييت في انك تسوق وتبيع منتج بجد وهتكسب منه لأنها طريقة من طرق التسويق الفعالة جدا بس بردو الناس بتستسهل وتنصب بيها 

في بعض الناس عشان تقنعك تبدأ انها توريلك صور المفروض انها لارباحها من الحاجات اللي زي كدة طب اديني عقلك وامشي من غيره في كدة في الدنيا عموما ما تصدقنيش انا بضحك عليك وجرب وممكن تسأل اللي دخلوا في الموضوع ده هتلاقي ان اغلبهم بيقولك انا ما كسبتش من الانترنت ولا حاجة لأنهم ببساطة خدوا الطريق الغلط 

الخلاصة : في طريقين انك تكسب من الانترنت في ناس بتختار الطريق السهل والسريع للمكسب وبيقعوا في الفخ 

مافيش حاجة اسمها مكسب سريع ولا بدون تعب عشان تكسب لازم تتعلم الاول وبعدين تشتغل وتعتب عشان تكسب 

وعشان مااطولش عليكم اكتر من كدة هكمل في مقالة تانية ازاي فعلا ممكن تكسب من قعدتك على الانترنت بشكل سليم ومشروع بدون نصب ولا خداع ازاي تحول موهبتك او هوايتك وتستغلها في انك تعمل مشروع خاص على الانترنت لا محتاج مكتب ولا شركة ومع ذلك هتكسب وهتكسب كويس اوي كمان 

ملحوظة : في ناس هتهاجمني دول يا اما لسة مضحوك عليهم ومصدقين يا اما هم اللي بيضحكوا على الناس

خدعوك فقالوا الربح من الانترنت سهل الجزء الثاني 
by.shereen badr

تابع القراءة

ازاي احترف التسويق الاللكتروني ؟

ازاي احترف التسويق الاللكتروني ؟

ازاي احترف التسويق الالكتروني ؟ السؤال ده بيجيلي يوميا على الاقل خمس مرات وعشان كدة قررت اكتب تدوينه اقول فيها خبرتي 

البسيطة في المجال ده يمكن تساعد الناس 

طبعا انتوا عارفين ان علم التسويق الالكتروني جديد نسبيا علينا في الوطن العربي ولحد دلوقتي مش هتلاقي اماكن بتدرسه بشكل   اكاديمي واظن انه ما ينفعش يتدرس بشكل اكاديمي نظرا انه في تحديثات كل يوم في المجال ده طيب اية الحل لو انا عايز اتعلم تسويق الكتروني 

اولا اية هو التسويق الالكتروني واية الفرق بينه وبين السوشيال ميديا واية هو السيو (زي ما بتقولوا يعني والمقصود بيها seo)

online marketing 

التسويق الالكتروني هو جزء من التسويق يمكن هو اداه من ادوات التسويق زيه زي البيع الشخصي ، العلاقات العامة ، الاعلانات 

جوه التسويق الالكتروني ادوات زي السوشيال ميديا (فيسبوك ، تويتر ، جوجل بلس ، لينكيد ان ) وفي التسويق عبر محركات البحث اللي اسمها seo وفي الاعلانات المدفوعة زي ادوردز على جوجل واعلانات فيسبوك المدفوعة وفي الايميل وفي الافيلييت وقصة كبيرة 

طيب عشان انا اشتغل كل الحاجات دي اعمل اية ؟

اولا مافيش حاجة اسمها اشتغل كل الحاجات دي في حاجة اسمها اعرف الحاجات دي واتخصص في حاجة واحدة لأن كل حاجة من دول قصة كبيرة يعني هتلاقي حد متخصص تسويق عبر مواقع التواصل الاجتماعي اللي هي السوشيال ميديا وحد متخصص seo زي حالاتي كدة 

المهم عشان ما اطولش عليكم ازاي اتخصص في حاجة زي دي 

بص يا سيدي 

 -  بما ان التسويق الالكتروني جزء من التسويق فيبقى حضرتك لازم تكون فاهم تسويق اللي هو بيتكون من دراسة السوق ، دراسة البيئة الداخلية والخارجية للشركة بتاعتك ، المنافسين ، تقسيم الشرايح المستهدفة من العملاء ، اختيار الشريحة المستهدفة دي ، بعد دة اية هو المنتج او الخدمات بتاعتك واسعارها واماكن توزيعها وطرق الترويج بتاعتها ومن طرق الترويج بتاعتها دي بقى هتلاقي التسويق الالكتروني 

طيب عشان اتعلم تسويق اعمل اية 

اقرأ لابو التسويق اللي اسمه فيليب كوتلر لو سألت صديقنا جوجل هيجيبلك كل الكتب بتاعته

 لو جتلك فرصة انك تشتغل حاجة في التسويق اشتغل او خد تدريب ببلاش حتى  لأن ده هيفيدك كتير ما كانش مش مشكلة ركز في اللي جاي 

طيب وبعد ما اعرف التسويق اعمل اية 

ابدأ اقرأ بشكل عام عن التسويق الالكتروني اعرف كل تخصص بيتكلم عن اية وشوف اية اللي انت هتحس انك قادر تشتغل فيه وابدأ اتخصص فيه اكتر 

 عشان اسهل عليك في تلات اقسام اساسيين في التسويق الالكتروني : 

-  السوشيال ميديا ودي عايزة حد مبدع كدة وبيحب يجيب افكار جديدة في الترويج 

-  Seo  وده حد يقعد كدة يمخمخ ويفكر ويحلل ويعرف اشمعنى ده ظهر في محرك البحث الاول وده التاني واية الفرق بينهم ولية وازاي وفين وكل الاسائلة اللطيفة دي 

-  Sem واللي هي مختصة بالاعلانات المدفوعة زي جوجل ادوردز فده حد بتاع متابعة وتخمين حد بيحب يدخل مزادات يعرف يقلل التكلفة مع افضل نتيجة 

شوف انت مين من التلاته دول وابدأ اقرا في المجال وشوف فيديوهات وعروض كله متوفر

السؤال بقى اجيب كل الكلام ده منين ؟

بص يا سيدي اولا الكلام ده كله متوفر اونلاين دي مجموعة من اهم المواقع اللي ممكن تتابع عليها 

ممكن تتابع المواقع والمدونات دي 

blog.hubspot.com

 

 
moz.com/blog

 

 
socialmediaexaminer.com

 

 
searchenginejournal.com

 

 
nbound.org

 

 
searchengineland.com

 

 
searchenginewatch.com

 

  

blog.bufferapp.com

 

blog.kissmetrics.com

كل المواقع دي هتلاقي عليها كل اللي انت عايزه من مقالات ، كتب ، فيديوهات ، انفوجرافيكس ، وبينارز 

اما لو عايز تاخد شهادات ففي خمس شهادات تقدر تاخدهم اونلاين ومعظمهم مجانا من مواقع كبيرة زي : 

 اسم الشهادة : Google AdWords Certified Individual  من موقع Google 

 اسم الشهادة : Bing Ads Accredited Professional  من موقع Bing 

 اسم الشهادة : Inbound Marketing Certification من موقع Hubspot 

 اسم الشهادة : Microsoft Digital Certification  من Microsoft 

اسم الشهادة : social media managemegn  من موقع Hootsuite 

المهم بقى اهم من الدراسة والشهادات والحاجات اللطيفة دي انك تطبق اللي بتتعلمه لأنك من غير ما تطبق اللي بتتعلمه مش هتتعلم حاجة اتعلم وجرب والعب واغلط لأنك من غير ما تغلط مش هتتعلم بردو فعادي انك تغلط 

المهم كمان انك تفضل طول الوقت متابع الجديد بشكل يومي وعشان تتابع كل المواقع دي في نفس ذات الوقت في اداة ممكن تساعدك على انك تجمع كل المواقع اللي بتهمك في مكان واحد وهي هتجيبلك اخر المواضيع يوميا على كل موقع في مكان واحد  الاداة دي اسمها feedly.com

اما لو عايز تعرف الجديد في موضوع معين والاكثر انتشارا ممكن تدخل على الابلكيشن ده http://app.buzzsumo.com/  وتكتب اسم الموضوع وهو هيجيبلك كل المواضيع والناس اللي اتكلمت عنه وانتشرت بشكل كبير بين الناس 

كمان جمعتلكم كل صفحات الفيسبوك الخاصة بالمواقع المهتمة بالتسويق الالكتروني في قائمة واحدة ممكن تتابعها من هنا 

facebook list 

بس خلاص 

لية تحتفظ بالمعلومة لنفسك لما ممكن تعمل شير وتغيد غيرك    

by.shereen badr

تابع القراءة